TikTok ມີແປດຫຼັກການແນວທາງປະຕິບັດຊຸມຊົນທີ່ມີເປັນພື້ນຖານດ້ານຄວາມປອດໄພ ແລະ ຄວາມມຸ່ງໝັ້ນຂອງພວກເຮົາໃນການເຄົາລົບສິດທິມະນຸດ. ຫຼັກການຂອງພວກເຮົາກຳນົດວຽກປະຈຳວັນຂອງພວກເຮົາ ແລະ ແນະນຳວິທີທີ່ພວກເຮົາຈັດການກັບການຕັດສິນໃຈບັງຄັບໃຊ້ທີ່ຫຍຸ້ງຍາກ. ພວກມັນແມ່ນອີງໃສ່ຫົວຂໍ້ເຫຼົ່ານີ້:

• ການສ້າງຄວາມສົມດຸນລະຫວ່າງການປ້ອງກັນອັນຕະລາຍ ແລະ ການສະແດງອອກ
• ການໂອບຮັບເກຽດສັກສີຂອງມະນຸດ
• ການຮັບປະກັນວ່າການດຳເນີນການຂອງພວກເຮົາເປັນທຳ

ພວກເຮົາຮັບຮູ້ວ່າ ບາງຄັ້ງຫຼັກການເຫຼົ່ານີ້ຈະຈ່ອງດຶງກັນ ແລະ ພວກເຮົາຈະພິຈາລະນາຢ່າງລະມັດລະວັງ ເມື່ອພວກເຮົາຊັ່ງນ້ຳໜັກຫຼັກການໃດໜຶ່ງທຽບກັບຫຼັກການອື່ນ. ການພິຈາລະນາເຫຼົ່ານີ້ແມ່ນອີງໃສ່ຂໍ້ມູນຂອງໂຄງສ້າງທາງກົດໝາຍລະຫວ່າງປະເທດ ແລະ ຫຼັກປະຕິບັດທີ່ດີທີ່ສຸດໃນອຸດສາຫະກຳ, ລວມເຖິງ ຫຼັກການຊີ້ນໍາຂອງ UN ວ່າດ້ວຍທຸລະກິດ ແລະ ສິດທິມະນຸດ, ຮ່າງກົດໝາຍລະຫວ່າງປະເທດວ່າດ້ວຍສິດທິມະນຸດ, ອະນຸສັນຍາວ່າດ້ວຍສິດທິເດັກ ແລະ ຫຼັກການ Santa Clara. ພວກເຮົາຍັງຂໍຂໍ້ມູນຈາກຊຸມຊົນຂອງພວກເຮົາ, ຜູ້ຊ່ຽວຊານຄວາມປອດໄພ ແລະ ສາທາລະນະສຸກ ແລະ ສະພາທີ່ປຶກສາຂອງພວກເຮົາ.

1. ປ້ອງກັນອັນຕະລາຍ: ເປົ້າໝາຍຫຼັກຂອງພວກເຮົາຄືການເຮັດໃຫ້ TikTok ປອດໄພ ແລະ ເປັນສະຖານທີ່ສຳລັບຄວາມສຸກ. ພວກເຮົາພິຈາລະນາຫຼາຍວິທີທີ່ເນື້ອຫາ ຫຼື ພຶດຕິກໍາອາດສົ່ງຜົນກະທົບຕໍ່ຊຸມຊົນທີ່ມີຄວາມຫຼາກຫຼາຍຂອງພວກເຮົາ. ສິ່ງນີ້ລວມເຖິງອັນຕະລາຍຕໍ່ຮ່າງກາຍ, ຈິດໃຈ, ການເງິນ ແລະ ຄວາມເປັນສ່ວນຕົວຂອງບຸກຄົນ ພ້ອມທັງອັນຕະລາຍຕໍ່ສັງຄົມ. ເພື່ອບັນລຸຄວາມສົມດຸນທີ່ຖືກຕ້ອງກັບການສະແດງອອກຢ່າງເສລີ, ພວກເຮົາຈຳກັດເນື້ອຫາເມື່ອຈຳເປັນເທົ່ານັ້ນ ແລະ ໃນແນວທາງທີ່ພະຍາຍາມຫຼຸດຜ່ອນຜົນກະທົບຕໍ່ການເວົ້າ.
2. ເປີດໃຊ້ການສະແດງອອກຢ່າງເສລີ: ຄວາມຄິດສ້າງສັນທີ່ປົດລັອກໂດຍ ການສະແດງອອກ ແມ່ນສິ່ງທີ່ຂັບເຄື່ອນຊຸມຊົນທີ່ມີຊີວິດຊີວາຂອງພວກເຮົາ. ພວກເຮົາເຊີດຊູຫຼັກການນີ້ ໂດຍການໃຫ້ໂອກາດທີ່ຈະແບ່ງປັນຢ່າງເສລີໃນແພລັດຟອມຂອງພວກເຮົາ ໃນຂະນະທີ່ແກ້ໄຂພຶດຕິກໍາທີ່ສາມາດເຮັດໃຫ້ຄໍາເວົ້າຂອງຄົນອື່ນຖືກຢັບຢັ້ງນຳ. ເຖິງຢ່າງໃດກໍ່ຕາມ, ການສະແດງອອກຢ່າງເສລີບໍ່ແມ່ນສິດເດັດຂາດ – ມັນຈະຖືກພິຈາລະນາໂດຍທຽບໃສ່ອັນຕະລາຍທີ່ອາດເກີດຂຶ້ນຢູ່ສະເໝີ ແລະ ບໍ່ຂະຫຍາຍຕໍ່ໄປຫາການແນະນໍາເນື້ອຫາຂອງທ່ານໃນຟີດສຳລັບທ່ານ.
3. ສົ່ງເສີມມາລະຍາດ: ຄວາມສຸພາບສ້າງຄວາມເຄົາລົບລະຫວ່າງຜູ້ຄົນ ແລະ ຊ່ວຍໃຫ້ຊຸມຊົນຈະເລີນເຕີບໂຕ. ວິທີທີ່ພວກເຮົາມີສ່ວນຮ່ວມເຊິ່ງກັນ ແລະ ກັນໃນໂລກອອນລາຍສາມາດຂົ່ມຂູ່ການມີສ່ວນພົວພັນໃນທາງບວກກັບຄົນອື່ນ, ດັ່ງນັ້ນ ການເປັນພົນລະເມືອງດີໃນ TikTok ແມ່ນສໍາຄັນຕໍ່ການເຮັດໃຫ້ພາລະກິດຂອງພວກເຮົາສໍາເລັດ. ນີ້ໝາຍເຖິງການຮັບຮູ້ ກຽດສັກສີທີ່ມີມາແຕ່ກຳເນີດຂອງທຸກໆຄົນ ແລະ ປະຕິບັດຕົວເຮົາເອງຄືກັບວ່າພວກເຮົາປະເຊີນໜ້າກັນແທ້ຢູ່. ເພື່ອຮັບປະກັນພື້ນທີ່ສໍາລັບການສະແດງອອກ, ພວກເຮົາອະນຸຍາດໃຫ້ມີທັດສະນະເພີ່ມເຕີມສໍາລັບການວິພາກວິຈານທາງສັງຄົມຂອງບຸກຄົນສາທາລະນະ.
4. ເຄົາລົບສະພາບການທ້ອງຖິ່ນ: TikTok ນຳເອົາຜູ້ຄົນຫຼາຍກວ່າພັນລ້ານຄົນໃນທົ່ວ 150+ ປະເທດມາຮ່ວມກັນໃນພື້ນທີ່ດິຈິຕອນທີ່ໃຊ້ຮ່ວມກັນ. ພວກເຮົາເຮັດວຽກກັບຜູ້ຊ່ຽວຊານລະດັບພາກພື້ນ ແລະ ຊຸມຊົນທ້ອງຖິ່ນ ເພື່ອຊ່ວຍໃຫ້ແນ່ໃຈວ່າວິທີການທົ່ວໄປຂອງພວກເຮົາໄດ້ພິຈາລະນາເຖິງຮູບແບບການພົບກັບອັນຕະລາຍທົ່ວພາກພື້ນ ແລະ ພວກເຮົາອະນຸຍາດໃຫ້ມີການນໍາໃຊ້ແນວທາງປະຕິບັດຂອງພວກເຮົາໃນພາກພື້ນ, ໃນຂະນະທີ່ຮັກສາເສັ້ນຖານຂອງສິດທິມະນຸດທີ່ເປັນທີ່ຍອມຮັບໃນສາກົນ.
5. ສົ່ງເສີມການມີສ່ວນຮ່ວມ: ພວກເຮົາຕ້ອງການໃຫ້ຄົນຈາກທົ່ວໂລກຮູ້ສຶກຍິນດີຕ້ອນຮັບໃນແພັດຟອມຂອງພວກເຮົາ. ພວກເຮົາໃຫ້ຄຸນຄ່າ ແລະ ສະເຫຼີມສະຫຼອງວັດທະນະທໍາ, ເອກະລັກ, ຮູບລັກສະນະ, ທັດສະນະ, ຄວາມສົນໃຈ ແລະ ປະສົບການທີ່ແຕກຕ່າງກັນ. ພວກເຮົາຮູ້ວ່າບາງຊຸມຊົນໃນປະຫວັດສາດໄດ້ຮັບໂອກາດໜ້ອຍກວ່າສໍາລັບການມີສ່ວນຮ່ວມ, ດັ່ງນັ້ນ ພວກເຮົາມີຄວາມມຸ່ງໝັ້ນຕໍ່ຫຼັກການຂອງຄວາມເທົ່າທຽມ ແລະ ການຫຼຸດຜ່ອນອັນຕະລາຍທີ່ສົ່ງຜົນກະທົບຕໍ່ກຸ່ມຄົນດ້ອຍໂອກາດ.
6. ປົກປ້ອງຄວາມເປັນສ່ວນຕົວຂອງບຸກຄົນ: ພວກເຮົາມຸ່ງໝັ້ນທີ່ຈະປົກປ້ອງ ແລະ ເຄົາລົບຄວາມເປັນສ່ວນຕົວໃນຊຸມຊົນຂອງພວກເຮົາ ແລະ ຂອງບຸກຄົນທີ່ສະແດງ ຫຼື ເປັນປະເດັນສົນທະນາໃນເນື້ອຫາເທິງແພລັດຟອມຂອງພວກເຮົາ. ພວກເຮົາພະຍາຍາມຮັບປະກັນວ່າເນື້ອຫາທີ່ແບ່ງປັນໃນແພລັດຟອມ ບໍ່ໄດ້ເປີດເຜີຍຂໍ້ມູນສ່ວນຕົວຂອງໃຜ ຫຼື ບຸກລຸກຄວາມເປັນສ່ວນຕົວຂອງເຂົາເຈົ້າ.
7. ສະໜອງຄວາມໂປ່ງໃສ ແລະ ຄວາມສອດຄ່ອງ: ພວກເຮົາຕ້ອງການໃຫ້ທຸກຄົນຮູ້ເຖິງກົດລະບຽບ ແລະ ມາດຕະຖານຂອງພວກເຮົາ ແລະ ວິທີທີ່ພວກເຮົານໍາໃຊ້ມັນ. ພວກເຮົາພະຍາຍາມທີ່ຈະໃຫ້ແຈ້ງການທີ່ຊັດເຈນຂອງນະໂຍບາຍ ແລະ ການປະຕິບັດຂອງພວກເຮົາ, ການນໍາໃຊ້ມັນຢ່າງສະໝ່ຳສະເໝີ ແລະ ສະເໝີພາບ ແລະ ການແບ່ງປັນຄວາມພະຍາຍາມບັງຄັບໃຊ້ໃນສູນຄວາມໂປ່ງໃສຂອງພວກເຮົາ. ພວກເຮົາຈະຊັດເຈນກັບແນວທາງປະຕິບັດ ໃນເວລາທີ່ພວກເຮົາຕ້ອງການໃຫ້ຄວາມສໍາຄັນກັບຫຼັກການອື່ນຫຼາຍກວ່າຄວາມສອດຄ່ອງ ເຊັ່ນ: ບໍລິບົດຂອງທ້ອງຖິ່ນ ຫຼື ການມີສ່ວນຮ່ວມ.
8. ມີຄວາມຍຸຕິທໍາ ແລະ ທ່ຽງທຳ: ການກັ່ນກອງເນື້ອຫາຫຼາຍລ້ານຢ່າງໃນແຕ່ລະມື້ແມ່ນຄວາມພະຍາຍາມທີ່ຊັບຊ້ອນ ແລະ ການພັດທະນາຂະບວນການທີ່ເຊື່ອຖືໄດ້ໃນການດຳເນີນການດັ່ງກ່າວນັ້ນແມ່ນພື້ນຖານ. ພວກເຮົາມຸ່ງໝັ້ນທີ່ຈະເປັນກາງ ແລະ ອີງໃສ່ຫຼັກຖານ, ຜະລິດຜົນໄດ້ຮັບທີ່ຍຸຕິທໍາ, ແຈ້ງການປະຕິບັດການບັງຄັບໃຊ້ ແລະ ໃຫ້ໂອກາດທີ່ຈະອຸທອນ.